Rusiyeniñ Nijniy Novgorod vilâyeti dronlarnıñ ücümine oğradı, sanayı müessiseleri nişan oldı, dep bildirdi vilâyet valisi Gleb Nikitin.
Onıñ aytqanına köre, Arzamas okrugında müessiseniñ bir hadimi adise yerinde can berdi, yaralanğan eki kişi hastahanege alındı.
ASTRA Telegram kanalı foto ve videolarğa esaslanıp, uçucısızlar özüni «eñ ileri müessiselerden biri» olaraq tanıtqan ve ABD ve AB sanktsiyaları altında olğan alet yapqan zavodqa ücüm etti.
Rusiye valisi haber etken ekinci sanayı alanı, ilk malümatqa köre, – bir qaç müessise yerleşken Dzerjinsk şeerindeki rayon. Shot Telegram kanalı yerli sakinlerge esaslanıp, saba olar bir qaç patlav eşitti, dep bildirdi.
Rusiye Mudafaa nazirligi uçaq çeşitli yedi ukrayin uçucısızını yoq etkeni aqqında bildirdi, ekisi – Nijniy Novgorod vilâyetinde tüşürilgen eken.
Ukrayina tarafı bu malümatnı izaatlamadı.
Rusiyeniñ Ukrayinağa qarşı büyük istilâsı başlağan soñ Rusiye regionları ve işğal etigen topraqlar dronlarnıñ ücümlerine muntazam sürette oğray. Ukrayina tarafı böyle darbelerni er vaqıt izaatlamay, amma istilâcınıñ ücüm imkânlarını eksiltmek içün Rusiye ordusınıñ bazalarını zayıflatmağa tırışa.
