Rusiyedeki Hakasiyanıñ №33 koloniyasında cezasını çekken qırımtatar vatandaş jurnalisti Remzi Bekirov sağlıq problemleri ve nezaretçiler ve memuriyet tarafından basqı aqqında bildirdi. Bu aqta «Qırım birdemligi» qırımlınıñ ömür arqadaşı Halide Bekirovanıñ malümatına esaslanıp haber ete.
Onıñ aytqanına köre, soñki vaqıtları Bekirov tahminen 30 kilogramm azdı. Koloniyadaki aşlar çekine ve sağlığına menfiy tesir ete.
«Onı ceza izolâtorına yollasalar, aşnıñ portsiyası yarısından ziyadesine eksile. Böyle bir portsiyanen toymaq imkânsız ola. Aşta oña vitamin, mineral yetmey, olar [mabüsler] ne et, ne «süt» köre. Meyva ve sebze arzu etemezsiñ, dep aytqan edim aqayım. Küneş de körmey. Bular tiş, saç, kemiklerge tesir ete», – dep qayd etti Halide.
Kündüz koloniyada töşekke yatmaq yasaq olğanı ve uzun-uzun ayaqta turmağa mecbur olğanları içün jurnalistniñ damarları zarar kördi – varikoz raatsızlay.
Bundan ğayrı, Bekirovnıñ tişleri tedaviylenmeli: tişleri töküle ve tüşe. Onıñ aytqanına köre, apishanedeki tiş ekimi tiş ağrısından paratsetamol bere ve tişnen oğraşmayıp, çıqarmağa teklif ete.
Remzi Bekirov — vatandaş jurnalisti, «Qırım birdemliginiñ» faali. Jurnalist Qırım sakinlerine qarşı siyasiy sebeplerden açılğan davalar boyunca tintüvler ve mahkemelerniñ yayınlarını alıp bardı, şu cümleden «Veciye Kaşka» davası, arhiyepiskop Klimentniñ tutuluvı, «Hizb ut-Tahrir» ve diger davalar. Remzi Bekirov Qırım siyasiy mabüsleriniñ qorantalarına yardım etmek ğayesiniñ teşebbüsçisidir. Çağına yetmegen üç balası bar.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
