Qırımnıñ Rusiye prokuraturası demiryollarında «terakt» azırlağanında qabaatlanğan beş insanğa qarşı dava tahqiqatını bitirdi, dep bildirdi.
«Gruppanıñ maqsadı naqliyat infrastrukturası obyektlerinde terakt yapmaq ve akimiyet organlarınıñ faaliyetini kerginleştirmek edi», – dep aytıla haberde.
2024 senesi mayısta, matbuat hızmeti bildirgenine köre, gruppanıñ azaları bir reberden vazife alğan, gizli bir yerde elnen yapılğan patlayıcı cihazlarını tapıp, yaşağan yerlerine almaq kerek eken.
Böyle bir cihazlardan birini almağa tırışqanda qabaatlanğan bir kişi elâk olğan eken. Qalğanlarını Rusiye FSBsiniñ hadimleri tuttı.
Rusiye akimiyetiniñ versiyasına köre, bu cihazlar yardımınen Qırımnıñ İslâm Terek ve Yedi Quyu rayonlarınıñ demiryollarında patlavlar yapılacaq edi.
Davanı Rostov-na-Donudaki Cenübiy okrugınıñ arbiy mahkemesi baqacaq – qırımlılarğa qarşı siyasiy sebepli davalarnı baqqan mahkeme.
Mabüslerniñ adları ve soyadları, olarnıñ açıq izaatlarını Rusiye prokuraturası derc etmey.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
